شهرستان نمین

معرفی شهرستان نمین

خوراسان زیارتینه مشرف اولماق قایدالاری
ساعت ٩:٢۸ ‎ق.ظ روز ٢٤ خرداد ۱۳٩۱  کلمات کلیدی: رحیم اسداللهی ، سرعین ، زیارت ، ائل بیلیمی

استاد رحیم اسداللهی (درویش )-سرعین

 زیارته نایل اولان زوّارلار ائولرینده ناهار و شیرینی قویوب، کندین چاووشونو چاغیراردیلار. ائل - طایفاسی دؤوره‌سینه توپلانیب اونو یولا سالماق اوچون سلام تپه‌سینه کیمی گئدردیلر. هر کندین شهر یولونون آغزیندا اولان تپه‌سینه «سلام تپه‌سی» دئیردیلر. کند اهلی او تپه‌دن زوارلاری امام قوللوغونا یولا سالاردی، زوّارلار دا زیارتدن قاییدان زمان یئنه ده او سلام تپه‌سینده دایانیب، کند اهلی اونون قاباغینا گلردیلر و چاووش سسلنه - سسلنه زوّارلاری کنده آپاراردیلار. زیارته گئدنین بوینونا یاشیل پارچا دولاردیلار. هامی خوراسانا گئدنین کیم اولدوغونو بیلردی.

زوّارلاری یولا سالانلار اونون الیندن، اوزوندن اوپوب، التماس دعا ائله‌ییب «منی اونودمایین» دئیردیلر. کند اهلی زوّارین جیبلرینه پول قویوب، آغلایا - آغلایا یولا سالاردیلار. زوّار ایسه جیبینه توپلانان پوللاری امامین حرمینه آتیب، اونلاری دوعا ائلردی. چاووش سسلننده کندین دَللَگی (سلمانیسی) یئره دستمال سریب، چاووشا پول ییغاردی. بو قانونلار وارلی‌یا  یوخسولا شامل ایدی. زوّار خوراساندان قاییداندا دا یئنه جماعت کنددن تؤکولوب سلام تپه‌سینه چاووشون سسی ایله قاباغا گئدردیلر.

زوّار زیارت گونلرینده مشهددن لازیمی قده‌ر نخود – کیشمیش آلیب، اؤزو ایله آپاردیغی قورو چؤره‌یی اوغوب اونلارا قاتیب تبرک اولسون دئییه بیر توربانین ایچینده امامین حرمینه سورتوب، قاییدان باش اونو کنده گتیریب، زیارته یوللانان زامان بوینونا سالیندیغی یاشیل پارچانی تیکه-تیکه بؤلوب، آراسینا تبرک ائتدیگی سوغاتدان باغلاییب، ایسته‌دیگی آداملارینا وئرردی. بیرده مشهدین گؤزل سوغاتلاری امامین تورپاغیندان دؤزلَن موهور-تسبیحی ایدی.  زوّارلار کند اهلینه سوغات گتیرردیلر، کند اهلی ده بیر کلّه قند ایله اونلارین گؤروشونه گلَردیلر. بیر هفته‌دن سونرا زوّارین بوخچاسی آچیلیب او تبرُک اولان سوغاتلار پایلاناردی.

 منبع: بولتن ائل بیلیمی