محمد موسا زاده(بولتن ائل بیلیمی -ویژه نمین )

آذربایجان خالقی‌نین، موختلیف مراسیملری و همین مراسیمه باغلی بیر سیرا  اینانجلاری وار، بونلارین ان گؤزلی، توی و شینلیک دبلریدی.   گرچی بو مراسیملر، بوتون شهر و کندلرده  آشاغی-یوخاری عینی سویه‌ده توتولور، آنجاق  کندلریمیزده  داها آرتیق  اؤز اصالتین ساخلامیشدیر.  بونلار کئچه‌جکده اولدوغو کیمی یئرینه یئتیریلیر.

نمینه باغلی اولان اورنج کندینین توی مراسیمنده  بیر قندسیندیرما گئجه‌سی وار، بو قند سیندیرما گئجه‌سی و اونون دالیسینجا دا سیندیریلان کله‌ قندلرین باشینی  قیز-اوغلانین باشینا اوغماقدا بیر پارا معنالی و  درین حکمتلر وار.  آشاغیدا همین مراسیم و  حکمتلردن دانیشیلاجاق.

 


قند سیندیرما گئجه سی

ائله کی هر ایکی طرف (اوغلان و قیزین آتا و آناسی) راضیلاشاندان سونرا،  ائله‌جه ده   قیز اوغلان بیر-بیرین بَینن‌دن سونرا، اوغلانین آناسی، باجیسی و بیر-ایکی نفر یاخین فامیل‌لریندن  قیز ائوینه ائلچیلیگه گئدیب،  قیزدان ائلچیلیک ائله‌ییب،  قند سیندیرماق گئجه‌سین نه زامان اولاجاغینی تعیین ائدرلر.

او گئجه اوغلان ائوی نئچه خونچا بزه‌ییب، ائل طایفانین آغ ساقّقاللاری،  آغ بیرچکلری،  اوغلانین باجیلاری و یاخین فامیل‌لرینن قیز ائوینه دئییب، گولر یوللانارلار. قند سیندیرما گئجه‌سینده اوزون بیر دانیشیقدان سونرا کبین، باشلیغین نئچه اولاجاغی اوستونده راضیلاشیب، شیرنی پایلانار. اوغلان ائوی اؤنجه‌دن قیز ائوینه ایکی کلله قند، قئیچی، داراق و .... گؤندررلر.  ایکی طرفین یاخین قوهوم و تانیشلارینی قیز ائوینه چاغیرارلار.

قند سیندیرماغا باشلایینجا دا ایلک اؤنجه قیزین قندینی سیندیرار، کبین کسمه‌نی سونرایا ساخلایارلار. قئیچی‌نین دیزینی یا دؤشکچه‌نین آلتینا قویار و کبین کسر. اوغلان ائوینین حؤرمتلی بؤیوکلریندن، ایکی کلله قندی بیر– بیرینه وورار و سیندیرار . گوجو چاتمازسا، قند کرکی‌سی ایله سیندیرار.

قند سیندیران مجلیسین آغ ساققالاریندان بیری اولار، قندی سیندیرمامیشدان قاباق دئییر کی قند سینمیر، قیزین  آناسی قند سیندیرانا بیر خلعت وئرر، قند سینار. 

ایلک قند سیناندان سونرا  قند سیندیران دئیر:

-         دئیون مبارک دی ، خوشباخت اولسونلار

جمعده اوتورانلار دا اوجادان سسلنرلر :

-         آللاه موبارک ائلسین

ائله کی خانیملار بو سسی ائشیتدیلر ال چالیب، هوی چکرلر.  قندین باشینی بیر نفر اوغلان آدامی گؤتورر کی اونون یئرینه دَیَرلی بیر خلعت آلسین.

سینمیش قندلری قیز اولان اوتاغا کی ایکی طرفین خانیملاری  ییغیشیبلار آپارار، قیزین باشی اوسته بیر پارچا آچیب اونون اوستونده اوغارلار .

کبین کسیلمه‌دن اؤنجه  قند سینارسا، بو قند سیندیرما گئجه‌سینین صاباحیسی هر یئرده دئیرلر:

-          فیلان کسین قیزی‌نین قندین،  فیلان اوغلانا سیندیریبلار.

بو مراسیملرده نئچه درین معنالار و حیکمتلر وار کی اینسانلار اونلار دیقت یئتیرمکله  یاخشی درسلر آلیب،  اؤز فرهنگینه، کؤکینه آرخلانییر.

بو مراسیمده کلّه قند باشی قارلی بیر  داغین سیمبولودور. داغین اتگی چؤرکلی اولار و هر بیر طرفیندن زینه بولاقلار آخیب،  دؤوره‌سینه گؤزللیک باغیشلاییب،  طراوت وئرر و همی ده داغین آلنی آچیق،  باشی اوجا اولار.  اؤز دؤشونده غیرتلی آسلانلار و قارتاللار بئجردیب،  اونلارا یول یولاق اؤیردر. آتالار ، آنالار بئله رسملرده درین معنالی سؤزلر و نصیحتلر گله‌جک نسیل‌لره گؤستریب،  آنلادیلار کی یئنیجه باشلانان حیات، ایکی گنج  آراسیندا داغ کیمی اوجالانسین و شیرینیلیک بوی آتیب، حیاتین یال- یاماجین گؤزل‌لندیریب،  صمیمیت و دوزلوک بولاقلاری قایناییب جوشسون.

بو مراسیمده  ایکی جاوانا دئییلیر کی دولانیشیق بیر داغدیر کی هله- هله سینماز و ذیروه‌سی توفانلار، قار بورانلار قارشیسیندا گؤیلره باش قالدیریب، زامانا یوکو آلتیندا بئلین اگمییه. 

کله قندین باشین ساخلارلار نئیه کی او برک اولار تئزلیکله اریییب،  ایتمز، بو واسیطه‌یله ده قیزلا اوغلانی ایناندیرا کی هر  چتینلیگین قارشیسنیدا برک دایانمالارینا ایناندیرماق ایسترلر.  ایکی قندین باشین بیر –بیرینه سورترک اوغماسیله دا بونو دئمک ایسترلر کی داغلار کیمی باش باشا وئریب باش اوجا  یاشایاسینیز.




:: برچسب‌ها: شهرستان نمین, ائل بیلیمی, قند سیندیرما
ن : سولماز پورنعمت پیله رود
ت : ۱۳ آذر ۱۳٩٠
نظرات ()
 
 

پیچک