محمد علی اوجاقی نیارق(بولتن ائل بیلیمی -ویژه نمین )

خالقیمیزین چوخ عصیرلیک شیفاهی ادبیاتی‌نین مهم بیر حیصه‌سینی ده لایلالار یاخود بئشیک نغمه‌لری تشکیل ائدیر. لایلای آنالارین ایستک و آرزولارینی عکس ائتدیرن بایاتی وزنینده شعرلردیر. آنالار کؤرپه اوشاقلاری بئشیگه قویوب حزین و یوخلادان هاوا ایله لایلای چالارلار.

آشاغیدا ویلکج ماحالیندا خصوصیله ده نیارا (نیارق) کندینده یایغین اولان لایلالارین نئچه‌سینی خدمتیزه تقدیم ائدیریک.

 لایلای چاللام اوجادان

سسیم چیخمیر باجادان

آللاه سنی ساخلاسین

چیچکدن قیزیلجادان

 


***

لایلای چاللام گونده من

کؤلگه‌ده سن، گونده من

ایلده قوربان بیر اولسا

سنه قوربان گونده من

***

لایلای چاللام یاتاسان

قیزیل گوله باتاسان

 قیزیل گولون ایچیندن

شیرین یوخو تاپاسان

***

لایلاسی درین بالا

یوخوسو شیرین بالا

آللاهدان آرزوم بودور

تویونو گؤروم بالا

***

لایلای بئشیگیم لایلای

ائویم ائشیگیم لایلای

سن گئت شیرین یوخویا

چکیم کئشیگین لایلای

***

لایلای چاللام آی باشی

بئشیگین مرمر داشی

بالینجیوا گول ویررام

یاسدیغیوین یولداشی. . .

***

لای لای دئدیم یاتاسان

قیزیل گوله باتاسان

گول یاستیغین ایچینده

شیرین یوخو تاپاسان.

***

لای لای دئدیم همیشه

کاروان گئدر ائنیشه

یاستیغیوا گول ووررام

دؤشگینده بنؤوشه.

***

لای لای بئشیگیم، لای لای

ائویم-ائشیگیم، لای-لای

سن گئت شیرین یوخویا

چکیم کئشیگین، لای لای.

***

لای لای امگیم بالا

دوزوم، چؤرگیم بالا

گؤزله رم بؤیویه سن

گؤروم کؤمگین بالا.

***

لای لای دئدیم اوجادان

سسیم چیخسین باجادان

آللاه سنی ساخلاسین

چیچکدن قیزیلجادان




:: برچسب‌ها: شهرستان نمین, ائل بیلیمی, لایلالاربئشیک نغمه لری, محمد علی اوجاقی نیارق
ن : سولماز پورنعمت پیله رود
ت : ٢٧ آذر ۱۳٩٠
نظرات ()
 
 

پیچک